Madaxweynaha Kenya William Ruto ayaa arbacadii la soo dhaafay cadaadis kala kulmay shacabka Kenya kadib dibad baxyo dhowr ah, waxa uuna diiday in uu saxiixo sharciga Maaliyadda 2024 si uu sharci u noqdo.
Talaabadan ayaa daba socota mudaaharaadyadii dhimashada badnaa ee Talaadadii dhacay kaasoo ay ku arkeen mudaaharaadayaal ku xadgudbay xarunta baarlamaanka markii ugu horeysay taariikhda Kenya.
“Kadib markii la meel mariyay hindise sharciyeedka, dalka waxaa si weyn looga dareemayay in aan ku qanacsaneyn xeerka la ansixiyay, waxaana wax laga xumaado ah ka dhashay qasaare nafeed, burbur hanti iyo sharaf dhac lagu sameeyay hay’adaha dastuuriga ah. Waxaan tacsi u dirayaa ehelada dadkii ay eheladooda ku waayeen sidaan foosha xun.
"Sidaas darteed, markaan dib u milicsado wadahadalka sii socda ee ku saabsan nuxurka sharciga maaliyadda, 2024, waxaan diidi doonaa inaan ansixiyo sharciga," ayuu ku yiri khudbad uu telefishinka ka jeediyay Aqalka Madaxtooyada Arbacadii oo ay garab taagnaayeen xubnaha xisbiga talada haya ee Baarlamaanka oo u codeeyay ee sharciga.
Go'aanka madaxweyne Ruto ayaa loo badinayaa in loo arki doono isku day lagu doonayo in lagu dejiyo xiisadaha horay u sii kordhayay kadib dibad-baxyadii Talaadadii ka dhacay dalka oo dhan.
“Waxa kale oo aan soo jeedinayaa in 14-ka maalmood ee soo socda la qabto shirweyne dhinacyo badan leh oo dhinacyo badan taabanaya, kaas oo la doonayo in lagu jaan-gooyo dariiqii loo mari lahaa arrimaha la xidhiidha nuxurka xeerkan iyo sidoo kale qodobbo kaabis ah oo maalmihii u dambeeyay laga soo saarayay xeerkan. loo baahan yahay in la qaado tallaabooyin dhaqaale iyo xoojinta dagaalka aan kula jirno musuqmaasuqa,” ayuu yiri Madaxweynaha.
Madaxweynuhu waxa kale oo uu amray in si degdeg ah loo dhimo miisaaniyada hawl-galka ee madaxtooyada iyo guud ahaan waaxda fulinta ee dawladda. Waxa uu sidoo kale u soo jeediyay Garsoorka, Baarlamaanka iyo maamul goboleedyada inay ku daydaan.
0 Comments