Ciidamo ka tirsan Baarayaasha Nairobi Central Sub-County ayaa gacanta ku dhigay laba qof oo lala xiriirinayo shabakad caalami ah oo ku lug leh xatooyada taleefannada gacanta, kaddib howlgal sirdoon ku dhisnaa oo laga fuliyay bartamaha magaalada Nairobi. Howlgalka ayaa ka dhacay waddada Charles Rubia Street, meel u dhow boosteejada mashquulka badan ee Buscar, halkaas oo lagu qabtay laba baakad oo loo waday dalka Uganda.
Markii baakadaha la furay, boolisku waxay heleen ku dhowaad 900 oo taleefanno gacanta ah oo la tuhunsan yahay in la soo xaday. Baaritaanno hordhac ah ayaa muujinaya in labada eedeysane ay qayb ka yihiin shabakad ballaaran oo ka shaqaysa xatooyada taleefannada laga dhaco dadweynaha iyo dukaamada iibka taleefannada, kuwaas oo markaas loo suuq geeyo dalalka deriska ah. Labada nin ayaa ku guuldareystay inay bixiyaan sharaxaad macquul ah oo ku saabsan halka ay ka heleen qalabkan tirada badan.
Eedeysanayaasha oo lagu kala magacaabo Brian Yomasia iyo Stephen Okwachi Shisia ayaa isla goobta lagu xiray, waxaana lala geeyay xarunta booliska ee Nairobi Central halkaas oo lagu wado dhammeystirka baaritaannada ka hor inta aan maxkamad la soo taagin. Qabashadan ayaa timid wax yar kadib howlgal kale oo guuleystay oo dhacay 24-kii Janaayo 2026, kaas oo lagu soo furtay in ka badan 150 taleefan oo la xaday. Hay’adda Dambi-baarista (DCI) ayaa sheegtay inay sii wadi doonto howlgalada sirdoonka ku dhisan ee lagula dagaallamayo xatooyada taleefannada dalka oo dhan.
0 Comments