Madaxweynaha Puntland, Mudane Siciid Cabdullaahi Deni, ayaa maanta ka qeybgalay munaasabadda caleema-saarka Ugaas Cabdiraxmaan Ugaas Maxamed Ugaas Cali-geesood, oo ka dhacday deegaan ay isugu yimaadeen marti sharaf tiro badan. Munaasabaddan ayaa ahayd mid si weyn loo soo agaasimay, laguna muujiyay midnimo, wadajir iyo qiimeynta doorka hoggaanka dhaqanka ee bulshada Soomaaliyeed.
Munaasabadda caleema-saarka waxaa sidoo kale ka soo qeybgalay Guddoomiyaha Golaha Wakiillada Puntland Mudane Cabdirisaaq Axmed Saciid, masuuliyiin ka kala socday Dowladda Federaalka Soomaaliya, golayaasha kala duwan ee Dowladda Puntland, iyo hoggaan dhaqameedyo ka kala yimid gobollada dalka. Ka qeybgalka ballaaran ayaa muujinayay muhiimadda ay munaasabaddani u leedahay bulshada iyo doorka ay ugaasyadu ku leeyihiin xallinta khilaafaadka, nabadeynta iyo ilaalinta dhaqanka.
Khudbad uu ka jeediyay munaasabadda, Madaxweyne Siciid Cabdullaahi Deni ayaa hambalyo iyo bogaadin u diray Ugaaska cusub, isaga oo tilmaamay in hoggaanka dhaqanku yahay tiir muhiim u ah xasilloonida, wada noolaanshaha iyo horumarka bulshada. Madaxweynaha ayaa xusay in Dowladda Puntland ay mar walba garab taagan tahay hoggaanka dhaqanka, isla markaana ay ka shaqeynayaan iskaashi dhow oo lagu xoojinayo nabadda iyo midnimada bulshada.
Ugaas Cabdiraxmaan Ugaas Maxamed Ugaas Cali-geesood ayaa isna munaasabadda ka jeediyay hadal uu uga mahadceliyay dhammaan martidii ka soo qeybgalay caleema-saarkiisa, isaga oo ballanqaaday inuu ka shaqeyn doono midnimo, cadaalad iyo ilaalinta dhaqanka suuban ee bulshada uu hoggaaminayo. Munaasabadda ayaa ku soo dhammaatay duco, is xogwaraysi iyo farxad ay wadaagaan ka qeybgalayaasha.
0 Comments