Garoowe: Haweeney Soomaaliyeed oo lagu magacaabo Shukri Maxamuud Tarabi ayaa si rasmi ah uga baxday ganacsigii qaadka ee ay ka shaqeynaysay muddo 16 sano ah, iyadoo sheegtay inay go’aankan u qaadatay Alle dartii, si ay u bilowdo nolol cusub oo ka fog ganacsigaas.
Shukri ayaa ka mid ahayd haween badan oo ku tiirsanaa iibinta qaadka si ay u daboolaan baahiyaha qoyska, balse waxay sheegtay in muddo dheer ay ka fikiraysay inay ka tagto shaqadaas, ugu dambeyntiina ay go’aansatay inay qaaddo tallaabadaas inkastoo ay ogtahay inay la kulmi doonto caqabado dhaqaale. Waxay tilmaantay in go’aankeedu yahay mid ay ku raadinayso nolol xalaal ah iyo mustaqbal ka wanaagsan kan ay hadda ka tagtay.
Hooyadan ayaa kaligeed korinaysa carruurteeda, waxayna sheegtay in mas’uuliyaddaas ay ka dhigeyso mid u baahan il dhaqaale oo joogto ah. Iyadoo ka hadleysa xaaladdeeda, waxay bulshada Soomaaliyeed ugu baaqday inay u muujiyaan garab istaag, ha noqoto duco ama taageero dhaqaale, si ay u bilowdo ganacsi yar ama shaqo kale oo ay ku maareyso nolosha qoyskeeda.
Shukri ayaa sidoo kale muujisay rajo iyo adkeysi, iyadoo sheegtay inay diyaar u tahay inay dadaal sameyso oo ay wax walba ka bilowdo meel hoose, balse ay u baahan tahay fursad iyo taageero si ay uga gudubto marxaladdan adag. Qaar ka mid ah bulshada deegaanka ayaa durba soo dhaweeyay go’aankeeda, iyagoo ku tilmaamay mid geesinimo leh oo dhiirrigelin u noqon kara haween kale.
0 Comments